ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានហៅអ្នកដែលចោទថាការបោះឆ្នោតឃុំសង្កាត់អាណត្តិទី៥ នេះមានការលួចសន្លឹកឆ្នោតឱ្យមកស្បថ ហើយជួយបង្ហាញពីរបៀបនៃការលួចដល់សាធារណជនឱ្យបានដឹងផង។ សម្តេចបានថ្លែងបែបនេះនៅក្នុងពិធីបិទវគ្គបណ្ដុះបណ្ដាលឆ្នាំ២០២០-២០២១ និងបើកវគ្គបណ្ដុះបណ្ដាលឆ្នាំ២០២២ ដល់សិស្សសាលាភូមិន្ទរដ្ឋបាលនៅព្រឹកថ្ងៃច័ន្ទ ទី១៣ ខែមិថុនា ឆ្នាំ២០២២។
សម្តេចតេជោបានឱ្យដឹងថាតាមលទ្ធផលនៃការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ បង្ហាញថាប្រជាជនបានគាំទ្រគណបក្សប្រជាជនដល់ជាង ៧០ភាគរយនៃអ្នកបោះឆ្នោត ដែលធ្វើឱ្យគណបក្សនៅគ្រប់គ្រងតំណែងមេឃុំ-ចៅសង្កាត់ ៩៩ភាគរយ និងក្រុមប្រឹក្សាឃុំសង្កាត់ជាង ៨០ភាគរយដែលចំនួននេះបានបង្ហាញនូវការគាំទ្រយ៉ាងច្រើនដល់គណបក្សប្រជាជនគឺដូចជាការគាំទ្រដល់គោលនយោបាយរបស់គណបក្សដែលគាំទ្រដល់សន្ដិភាព និងការអភិវឌ្ឍ។
សម្ដេចឱ្យអ្នកដែលថាការបោះឆ្នោតមានការលួចបន្លំមកស្បថនិងជួយបង្ហាញឱ្យសាធារណជនបានឃើញពីរបៀបលួចផងដែរ។
សម្តេចបន្តថា៖ «បោះនៅក្នុងមណ្ឌល បោះនៅកន្លែងនេះបោះម៉ោង ៧ព្រឹក ម៉ោង ៣បិទ រួចហើយរាប់នៅកន្លែងហ្នឹង គេថាយើងលួច ហើយបើយើងបបួលស្បថ មិនដែលចេះហ៊ានទេ គេថាស្បថជារឿងកំប៉ិកកំប៉ុក រឿងអត់បានការ ប៉ុន្តែសូមបញ្ជាក់ថា រឿងស្បថមិនមែនរឿងតូចតាចទេ ប្រធានាធិបតីក៏ដោយ នាយករដ្ឋមន្ត្រីក៏ដោយ សមាជិកសភាក៏ដោយ មុនពេលចូលកាន់ដំណែងស្បថទាំងអស់ តើអាហ្នឹងវាកំប៉ិកកំប៉ុកទេ ពាក្យសម្បថនៅមាននៅរដ្ឋធម្មនុញ្ញ សូម្បីអាមេរិកាំងនៅយកគម្បីគ្រឹស្តទៅស្បថដែរតើស មិចបានស្បថជារឿងលេងសើច ថាជារឿងទល់់ច្រក?»។
សម្តេចសង្កត់ធ្ងន់ថា៖ «ចឹងពួកអ្នកឯងដែលចោទថាគេលួចនេះ ហ៊ានស្បថឱ្យរន្ទះបាញ់អត់ យើងនិយាយគ្នាចឹងវិញម្តង ហើយកុំប្រើវិធីថាអត់ហ៊ានស្បថទេ ស្បថជារឿងលេងសើច ជារឿងកំប្លែង […] ខ្លាចអីហ្នឹងស្បថបើសិនយើងមានភ័ស្តុតាងច្បាស់ បើមានភ័ស្តុតាងច្បាស់យើងស្បថទៅខ្លាចអី»។
ការលើកឡើងរបស់សម្តេចតេជោនាពេលនេះបន្ទាប់ពីមន្ត្រីជាន់ខ្ពស់គណបក្សភ្លើងទៀន លោក សុន ឆ័យ បានប្រកាសថាគណបក្សនឹងទទួលយកកៅអីក្រុមប្រឹក្សាឃុំសង្កាត់អាណត្តិទី៥នេះ បើទោះបីលោកមិនពេញចិត្តចំពោះលទ្ធផលនិងលើកឡើងថាការបោះឆ្នោតមិនសេរី និងអយុត្តិធម៌។
លោក សុន ឆ័យ ថា៖ «យើងប្រកាសថាការបោះឆ្នោតដែលមិនសេរីនិងមិនយុត្តិធម៌បានន័យថាយើងអត់ទទួលស្គាល់ការបោះឆ្នោតទេ តែយើងចង់ឱ្យកែលម្អ ដើម្បីឱ្យមានភាពយុត្តិធម៌ ដែលលទ្ធផលនេះមិនឆ្លុះបញ្ចាំងពីឆន្ទះរបស់ប្រជាពលរដ្ឋទេ តែបើសួរថាយក (កៅអី) ឬមួយក៏អត់ គឺយកអ្វីដែលជារបស់យើង យើងយក»។
គួររំលឹកថា ការបោះឆ្នោតជ្រើសរើសសមាជិកក្រុមប្រឹក្សាឃុំ/សង្កាត់អាណត្តិទី៥ បានធ្វើឡើងនៅថ្ងៃទី៥ ខែមិថុនា ដើម្បីជ្រើសរើសតំណែងជាសមាជិកក្រុមប្រឹក្សាឃុំ/សង្កាត់ នៅទូទាំងប្រទេសសរុបចំនួន ១១ ៦២២អាសនៈ ក្នុងចំណោមឃុំ/សង្កាត់ចំនួន ១ ៦៥២។ ពលរដ្ឋដែលចេញទៅបោះឆ្នោតក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ មានចំនួនជិត ៧លាន៣សែននាក់ ដែលស្មើនឹងជាង ៨០% នៃចំនួនពលរដ្ឋដែលមានសិទ្ធិបោះឆ្នោតជាង ៩លាន ២សែននាក់៕
